Rendition on The Battle of Lanka

Jai Shri Ram!!

Ram Lakhan sang chale hai Lanka
Vanar Sena chale unke saath,
Sab ko pata hai Sangram sameep,
Asur sena khadi Samundar ke paar.

Prashn hai mann mein, shatru hai kaun,
kisse pooche, sagar hai maun,
paana hai vijay, yeh hai Dridh nishchay,
Kintu Asur sena ki koi do parichay.

Kaun hai durbal, kaun balwaan,
Kiska Adbhut Vaan Sandan,
Kaun chatur ,Kaun Mayaavi,
Kiska Vaar padega Bhaari,
Door karo koi hamaari Shankaa,
Kaun khada hai tat par Lanka?

Vibhishan kahe "he suno Raghunandan,
Sab se Uttam Dashmukh Ravan,
Shresht Woh Yodha, Adbhut Vidwaan,
Mahadev ki kripa hai usko Pradhan.

Prahasth Durmukh Kumbh Nikumbh,
Indrajit chatur Aparampaar,
Bade ghamandi Shaktimaan sab,
Prahaar karne khade tayyaar.

Vishal hai Kaaya, Adbhut hai Maaya,
Kampe dekhke jan uskee saaya,
Nidra se jab woh jaagke aata,
Kumbhakarn ko koi rok na paata.

Yodha hai woh bada Anokha,
Prakat kabhi, kabhi aankh ka dokha,
Shatru ko cheer de uske vaan
Ravan ka putr hai veer mahaan,
Meghnad kaho ya Indrajit,
Naam nimit se sab hue bhayabhit."

Asur Mahaan,sab bade balwaan,
Tap sabne kiye,mil chuke vardaan,
Buddhi viheen ,ab kar rahe paap,
Yeh kab samjhe ek stri ka vilaap.

Fir Aarambh hua woh Maha Sangram,
Parajit Asur, vijayee hue Ram,
Paap ka Anth, Hari ka Avtaar,
Ramayan kaa yahi hai saar.