Vanvaas

Jai Shri Ram
Mukh mein hain chinta,Gambir hai chaal,
Honton par liye ek hi naam,
Lakhan ke sang ghanghor van mein,
Siya ko khojne nikal Pade Ram.

Pita ne kaha tum rajya sambhaalo,
Mata ne kaha chalo Vanvaas,
Ram ko kabhi na tha rajya ka moh,
na dhan ka lobh, na mukut ki aas.

Kaikeyi par bhaari pad gaya chaal,
Pati ki mrityu, Bharat ka krodh,
Lakhan chale van Ram ke sang,
Urmila chali nindiya ke godh.

Samay beet chala panchavati mein,
Pashu pakshi bhar sundar tha van,
Dukh ko bhool, parijan se door,
Khush the Sita, Ram, Lakhan.

Ek din swarn hiran jo aaya,
Rikht kuteer, Sita ko na Paaya,
Kator niyati, sab kuch yeh haare,
Dashrath ke do raj dulaare.

Ek vishal pakshi tadap raha tha,
shwaas shwaas par ek hi naam,
Anth kaal mein kare pratiksha,
Jatayu japta Jai Shri Ram.

Siya ko harke le gaya Ravan,
Ambar mein udta Pushpak Vimaan,
Ek baat na suni Jatayu ki,
Krodh mein har liye uske pran.

Kahaa hogi Siya, kya uska haal,
Vichalit man aur deh hai kaamp,
Kaun yeh Ravan, kahaa ka Raja,
Samjhe nahin ek stri ka vilaap.

Chalte chalte pahunche Kishkinda,
Ek booda Brahman kare unhe pranam,
Pehle jhalak mein pehchaan gaya woh,
Hanuman ka naman sweekar lo Ram.

Vali tha Kishkindha ka Raja,
Ravan ka mitr aur ati balwaan,
Sugreev tha uska bahishkrit bhrata,
Uske man mein Ram ka dhyaan.

Dhwand mein bula liya vali ko,
Peet peeche kare kayar ka kaary,
Maar diya use apne vaan se,
Sugreev ko vaapas de diya Rajy.

Vali ne jab unhe dukh se dekha,
lajjit aur apraadit Ram,
vachan de diya us vanar ko,
tohre vaan se chal basenge shyaam.

Vaanar chal pade har disha mein,
Sita kaa na koi naam o nishaan,
vishal roop dhar kiye samundar paar,
Lanka pahunche Pavan sut Hanuman.

Hanuman ne Siya ko doond nikaala,
Ashok Van mein thi woh Sayani,
Ram ka naam japti woh baiti,
roti bilakti Sita Rani.

Saksham Raja, ek priya bhraata,
Adbhut yodha, shaastron ka gyaata,
ghamand mein apna buddhi gavaaya,
Ravan Lanka ko jalta paaya.

Samundar paar aake pahunchi,
Vanar Sena Lanka ke dwaar,
Shakti mein Uttam, maya mein nipun,
Asur sena hai takraane taiyyar.

Anth hua Dashmukh Ravan ka,
Bhishan Yudh mein Asur gaye haar,
Saty ki jeet, Dusht Sanhaar,
Ramayan ka yahi hai Saar.